ازاي تعمل / تعملي أكلك بالبيت زي المطاعم
الطرق البسيطة والسحرية اللي هتخلي أكلك زي بتاع المطعم
معظم مشاكلنا في أكل البيت انه مش مختلف وانه كمان ميشبهش اكل المطاعم اللي بتتقدم بطريقة جميلة تفتح النفس أنا بحكم عملي كمدير مطاعم بحاول أسهل الدنيا وهشرح ببساطة ازاي نخلي أكلنا يبقي زي بتاع المطاعم ويمكن أفضل كمان ونسهل علي الناس او ست البيت بالاخص ازاي تعمل اكل لأسرتها يبقي شهي ويشبه ما يقدم بالمطاعم اللي بندفع فيها فلوس كتير .
أولا لازم نكون عارفين اننا بنكلف أكلنا في البيت وبنصرف عليه كتير لكن فيه حاجات لو عملناها هتخلي أكلنا متميز وصدقوني محدش هيبص بره تاني للمطاعم لأنه في كل مره ولادك وزوجك هيلاقي تغيير
كمان مهم جدا اننا نكون عارفين إنه من أهم أسباب حبنا لأكل المطاعم هو تغير الشكل المعتاد عن اللي بيتقدم في بيوتنا ودلوقتي هقولكم عن بعض الافكار السحرية اللي هتبقي نقطة تحول في أكلنا
1- حاول / حاولي في بداية الاسبوع تعمل منيو كده حتي لو في دماغك عن ايه اللي ممكن اعمله طوال الاسبوع ودايما لابد ان يكون كل يوم مختلف عن الاخر حتي وان كان التغيير في صنف معين بس .
2- من ضمن الحاجات اللي بتفتح النفس وتخلي الاكل شهي وممتاز أطباق السلاطات ولازم تغيري علي قد ما تقدري من انواع السلاطات اللي بتعمليها يعني مش كل يوم طبق السلطة الخضراء دي علطول وان كان ولابد فحاولي تضيفي نوع خضار مختلف ولونه مميز علي طبق السلطة صدقوني هيديله اختلاف تام .
3- بالنسبة كمان لأطباق السلطة احنا في الفنادق والمطاعم ساعات بنغير الدرسينج أو تتبيله السلطة علشان تغير طعمها يعني نفس المكونات بس بطعم مختلف في كل مرة .
4- دايما لازم تهتمي بالشكل اللي هتقدمي بيه الاكل يعني عندك في النيش أطباق علي كل شكل وكل لون وغير مستخدمه خلي مثلا اجازتكم "الجمعه " في أطباق مختلف انا مش فاهم امال لازمتها ايه الاطباق الكتيره دي
5- كمان وانتوا بتقدموا الاكل حاولي تنظمي شكل الطبق والحاجة تتحط بطريقة مريحة .
6- كمان لو انتوا اسره كبيرة او حتي صغيرة ومهما كان كمية الاكل اللي هيتعمل خلي قدام كل واحد طبقة الخاص وفي الطبق ده ممكن تتضعي القليل من الارز بشكل معين او فورمه تخلي شكله حلو ممكن تستخدمي أي بوله صغيرة تضعي فيها الارز ثم تقلبيه علي الطبق ليأخذ شكل البوله بالاضافه الي قطعة اللحوم او الدجاج او الاسماك تبقي بجانب الارز وفككوا بقي من شغل النوايب اللي هتتوزع عالاكل .
لسه مخلصتش كلامي فيه طرق كتير وكتير جدا لو لاقيت تفاعل هنخلي باذن الله المتابعين دول محترفين وشيفات كبار أحسن من اللي بنشوفهم في المطاعم الكبيره والفنادق
